O Concello de Sarria abriu este venres un prazo de tres meses para solicitar as axudas da área de rehabilitación integral (Ari) do centro histórico da vila. Estas subvencións pódense pedir para os inmobles que se dediquen a domicilio habitual. As actuacións deben ser melloras de eficiencia enerxética e sustentabilidade en vivendas, obras de accesibilidade ou traballos de mantemento. Tamén se poden incluír os traballos de demolición de inmobles e a construción de novas vivendas, as cales deberán ter unha cualificación enerxética mínima B e cumprir, en todo caso, coas esixencias do código técnico da edificación, segundo sinalan as bases da convocatoria.
As axudas non poderán superar o 40% do custo dos traballos subvencionables, aínda que a porcentaxe poderá incrementarse ata o 75% se os ingresos da unidade de convivencia son inferiores a tres veces o Indicador Público de Renda de Efectos Múltiples (Iprem) ou se as subvencións dedícanse a actuacións de mellora da accesibilidade e acredítase que existen persoas con discapacidade ou maiores de 65 anos de idade.
O prazo de solicitude finaliza o próximo 15 de maio e as instancias débense entregar no rexistro do Concello. A convocatoria das axudas está dispoñible para consulta na base de datos nacional de subvencións, a páxina web do Concello, o portal de transparencia municipal e a concellaría de urbanismo.
O Concello conta este ano con 39.748 euros para as axudas do Ari. Deste importe, 29.132 son financiados polo Ministerio de Fomento, mentres que a Xunta achega a contía restante.
