A Uned Sénior de Sarria impartirá no segundo cuadrimestre as materias de inglés e patrimonio histórico, para as que abriu este luns o prazo de matrícula.
As clases da primeira das materias terán lugar os martes e estarán impartidas por María Consuelo Santiago González. Pola súa banda, patrimonio histórico será os mércores coa profesora Paula Salinas Somoza, informou a coordinadora da Uned Sénior de Lugo, María del Mar Traseira. Nos dous casos desenvolveranse de 17.00 a 19.00 horas na casa da cultura de Sarria.
O prazo para apuntarse pecharase o próximo 3 de marzo. Os formularios de inscrición pódense obter no consistorio. O importe da matrícula é de 50 euros por materia.
As clases comezarán o día 18, sempre que se chegue a un número mínimo de alumnos, puntualizou a entidade.
A Uned Sénior está dirixida a persoas maiores de 55 anos de idade que estean interesadas en enriquecer os seus coñecementos, con independencia da súa formación académica. Durante o primeiro cuadrimestre se ofreceronas materias de inglés e introdución á literatura galega, que incluíron visitas a monumentos e lugares de interese.
Este centro púxose en marcha en Sarria hai seis anos e cada curso ofrece catro materias, dúas por cuadrimestre.