A Confederación Hidrográfica do Miño-Sil (CHMS) adxudicou por algo máis dun millón de euros á empresa Construcións Alpi a rehabilitación dos desaugadoiros de fondo da presa de Vilasouto, no municipio do Incio. A actuación terá un prazo de execución dun ano.
Con estes traballos preténdese mellorar a seguridade e operatividade dos desaugadoiros. As novas instalacións deben permitir regular os caudais achegados ao río e que a auga teña unha "calidade aceptable", reducindo o volume de sólidos en suspensión e que estea suficientemente oxigenada.
As obras de rehabilitación dos desaugadoiros saíron a licitación en decembro por 1,2 millóns de euros. Ao concurso presentáronse catro empresas, entre as que foi excluída unha por baixa temeraria no prezo.
