O conselleiro de Cultura, Román Rodríguez, mantivo un encontro cos responsables do colexio do Cardeal de Monforte (os Pais Escolapios) aos que comunicou o obxectivo da Xunta de iniciar os trámites e que o monumento sexa declarado Ben de Interese Cultural (BIC).
O complexo está formado polo edificio do colexio coa fachada de estilo renacentista, a igrexa da nosa Señora da Antiga, o claustro e a pinacoteca. O templo alberga importantes obras de arte entre as que destaca o retablo maior, obra do escultor Fancisco Moure, realizado a principios do século XVII.
Tamén conta cunha estatua fundida en bronce do cardeal Rodrigo de Castro, obra de Juan de Bolonia. O museo, instalado na antiga sancristía, dispón de dous óleos do Greco e cinco táboas de Andrea del Sarto.
