O conselleiro de Cultura, Román Rodríguez, visitou este venres o colexio do Cardeal de Monforte para presentar o proxecto de conservación e rehabilitación que a Xunta de Galicia acaba de adxudicar e que afectará tanto á igrexa, como a un dos seus claustros e a áreas de visita pública grazas a un investimento de 420.000 euros. Trátase dos primeiros traballos que se realizan no inmoble tras a súa declaración como Ben de Interese Cultural (BIC), un recoñecemento que este venres foi xa publicado no Diario Oficial de Galicia (DOG).
O titular de Cultura subliñou que esta importante "achega", sumada á declaración BIC, garante o futuro dun edificio clave para a paisaxe cultural da Ribeira Sacra e para comprender a historia deste municipio e o desenvolvemento do Renacemento en Galicia.
Neste sentido, o conselleiro destacou o compromiso da Xunta coa protección e posta en valor do patrimonio cultural de toda a comunidade galega e especialmente co da Ribeira Sacra, onde se invisten máis de 4,5 millóns de euros en actuacións como as que se puxeron en marcha en Monforte.
Non será o único investimento que levará a cabo este ano no Colexio do Cardeal, pois, como explicou o conselleiro, prevese unha segunda intervención de 75.000 euros para restaurar diferentes bens artísticos do inmoble.
Román Rodríguez destacou que estas actuacións de recuperación patrimonial servirán para "engalanar a capital da Ribeira Sacra" de face á recta final para a súa declaración como Patrimonio da Humanidade pola Unesco.
O proxecto de restauración, financiado ao amparo do programa operativo FEDER Galicia 2014-2020, permitirá solucionar as gretas provocadas na igrexa polo soado terremoto de Lisboa de 1755 que, aínda que non comprometen á estabilidade das bóvedas, é preciso corrixir. As actuacións estenderanse por un prazo máximo de seis meses e resolverán os principais problemas de conservación deste monumento.
Visita
O conselleiro de Cultura non quixo perder este venres a oportunidade de visitar este espazo e gozar dos dous lenzos do Greco e das cinco táboas do autor manierista Andrea do Sarto que hai na sala, así como doutras pezas que hai neste espazo museístico de primeira orde.