A Xunta cede ao Concello un terreo para ampliar servizos en O Hospital

A Xunta de Galicia publicou onte no Diario Oficial de Galicia (DOG) a aprobación do cambio de titularidade en favor Concello de Monforte dunha superficie de dominio público viario anexa á área onde se instalará o futuro parque do Hospital.

Desde a administración municipal celebran a adquisición deste terreo, que reclamaron no seu momento, e anunciaron que a usarán para habilitar unha vía de servizo que axude ao mantemento da área recreativa, que se acha en proceso de construción.

A zona en cuestión sitúase na marxe esquerda da estrada LU-644 e esténdese por un tramo de estrada de 260 metros, entre os puntos quilométricos 0,890 e 1,150. Desta forma, o Concello pasa a ter plenas competencias para actuar na vía e asume ao completo a responsabilidade da súa conservación.

MÁS DETALLES. A Xunta informou de que este cambio de titularidade non afecta calzada e a beiravía, polo que queda garantida a continuidade da rede autonómica de estradas. E é que xusto á beira do futuro parque pasa a rolda urbana de María Emilia Casas Baamonde, de titularidade autonómica.

Desde o Goberno galego destacaron que con este movemento contribúen á posta en marcha do proxecto e engadiron que, a través da Axencia Galega de Infraestruturas, facilitouse en todo momento a actuación municipal, por entender "que é positiva" para o barrio. A Xunta espera "a mesma actitude" por parte do Concello monfortino.

Dita transferencia de titularidade tramítase de acordo co previsto na Lei 8/2013, do 28 de xuño, de Estradas de Galicia, que establece a súa aprobación por decreto da Xunta, a proposta da Consellería competente nesta materia e tras acordo entre as administracións implicadas.

O decreto ten efecto a partir do día seguinte á súa publicación no DOG, é dicir, este mércores. O Concello xa é, pois, o titular deste terreo, que amplía as posibilidades para un parque chamado a cubrir unha necesidade deste barrio de Monforte, que viu aumentada a súa poboación nos últimos anos.