A Consellería de Medio Ambiente comunicoulle ao comité español da Unesco que antes de que finalice este ano formalizará oficialmente a candidatura da Ribeira Sacra a ser Reserva da Biosfera. Así o comunicou a directora xeral de Patrimonio Natural, Belén do Campo, tras participar este martes nunha reunión do programa Hombre y Biosfera (MAB) amparado por este organismo das Nacións Unidas que tivo lugar en Madrid.
Do Campo sinalou que iso demostra que os trámites avanzan a bo ritmo e con pasos "firmes".
A formalización da proposta de Reserva da Biosfera Ribeira Sacra e Serras do Oribio e Courel producirase unha vez se conclúan os informes derivados do proceso de información pública, que se abriu o pasado 9 de agosto e xa está pechado. Só se presentaron dúas alegacións.
Este trámite desenvólvese, dixo a directora xeral, de forma dilixente, por iso é polo que confíe en poder presentar a candidatura antes do 1 de xaneiro de 2020.
Belén do Campo destacou que se trata dunha proposta "sólida, avalada por un gran consenso por parte dos distintos axentes implicados e que aglutina a un total de 23 concellos de Lugo e de Ourense cun alto valor paisaxístico e cultural en común, unidos pola súa aposta por un desenvolvemento sustentable baseado nas prácticas tradicionais".
Sobre o documento que se entregará á Unesco, esta responsable da Consellería de Medio Ambiente dixo que é froito de máis de dous anos de traballo durante os que a Xunta mantivo un diálogo constante con todos os axentes implicados e con intereses na declaración, entre eles, concellos, grupos de desenvolvemento rural, universidades, sector turístico e outros colectivos, que tiveron ocasión desde o principio de participar activamente e facer as súas contribucións á proposta.
INCREMENTO. Coa incorporación da Reserva da Biosfera Ribeira Sacra e Serras do Oribio e Courel, a extensión protexida en Galicia baixo esta figura incrementaríase ata chegar ao 34% do territorio, de aí a importancia da candidatura para a preservación e o recoñecemento internacional do patrimonio natural da comunidade. Na actualidade, Galicia conta con seis Reservas da Biosfera, que ocupan o 25% do seu chan.