A tarde deste domingo en Monforte tinguíase de loito por mor de senllos accidentes mortais. Por unha banda, unha muller perdeu a vida tras ser arroiada na LU-617. Ademais, un monfortino de 70 anos falecía golpeado polo seu remolque despois de que se encaixase contra el un coche.
SINISTRO DO EMPALME. José Manuel Fernández Fernández, monfortino de 70 anos, faleceu pasadas as nove e media da tarde deste sábado nun accidente de tráfico. O home, que participara nunha batida de caza maior, atopábase parado co seu coche e o remolque no que levaba aos seus cans na estrada que une Monforte e Escairón, nun tramo á altura do Empalme, en Tor. Segundo os indicios, o home baixouse do seu vehículo para asegurar algunha peza do seu remolque no momento no que un turismo impactou contra este e arroiouno. A pesar dos intentos dos servizos sanitarios desprazados para intentar reanimalo, finalmente perdeu a vida.
Na noite deste sábado este suceso foi moi comentado entre as numerosas cuadrillas de caza maior que hai tanto en Monforte como nos municipios limítrofes, pois o falecido era unha persoa moi coñecida. Rexentou o bar Morín, no barrio da Estación, durante anos.
ATROPELO NA LU-617. Unha muller perdía a vida tamén na noite do sábado logo de ser atropelada na LU-617, concretamente no punto quilométrico 4, ao seu paso polo concello de Monforte de Lemos, segundo informa o 112.
Uns minutos despois das 21:30 horas, os Bombeiros de Monforte comunicaban ao 112 Galicia a saída do persoal de urxencias tras ser alertados por mor dun accidente de tráfico.
Enseguida, os xestores de urxencias puxeron en alerta ao Urxencias Sanitarias de Galicia-061 e aos axentes da Garda Civil de Tráfico. Así mesmo, puxo o suceso en coñecemento da Policía Local e Protección Civil da localidade.
A pesar dos esforzos dos servizos sanitarios desprazados ata ao momento, só puideron confirmar o falecemento da persoa.
