A vendima no territorio amparado pola denominación de orixe Ribeira Sacra, que comezou oficialmente o pasado 15 de setembro, tamén se está vendo afectada, do mesmo xeito que sucede noutras zonas produtoras de Galicia, pola dificultade coa que se atopan as adegas para incorporar man de obra aos traballos de recollida.
En declaracións a Efe, o presidente do consello regulador, José Manuel Rodríguez, aclarou que, "porcentualmente", esa situación afecta nesta denominación de orixe moito menos que noutras, dado que a maioría das explotacións son pequenas e "os viticultores arránxanse eles mesmos, con axuda das súas familias" para facer a vendima.
En situación diferente atópanse as "adegas máis grandes" da denominación, que realmente teñen dificultades para atopar man de obra suficiente para recoller a colleita.
Por iso, explicou, moitas recorren a empresas "de servizos" que, a cambio dun "tanto por hora", proporcionan ás adegas "cuadrillas" que se encargan de facer a vendima.
"Isto tamén chegou aquí", dixo Rodríguez.
En canto á vendima deste ano, destacou que a uva está en perfecto estado e a recollida está a realizarse con tempo seco, polo que se espera unha colleita moi boa, que roldará os seis millóns de quilos.
