Toallitas, roupa, envases, rodas de tractor e ata un lavalouzas. Son algúns dos residuos que atoparon na canle do río Cabe Manuel Díaz González e un grupo de amigos que se propuxeron facer desta contorna un lugar máis limpo. Xa retiraron máis de 500 quilos de lixo desde finais do mes de maio, cando Díaz decidiu trasladar a Monforte de Lemos unha iniciativa cidadá que xa estaba presente noutros lugares.
O grupo de voluntarios non parou de crecer desde entón e agora está formado por unhas dez persoas que, polo momento, actúan a título particular. Cada domingo ármanse de sacos e percorren as beiras do Cabe, principalmente a zona de paseo que vai desde o parque de Os Condes ata Piñeira. Manuel Díaz di que "este tramo é un verdadeiro luxo que transcorre en plena natureza" e non entende como pode estar cheo de lixo. "A primeira vista pode que non se note, pero se te achegas á beira é cando realmente ves todo o lixo que hai", detalla este monfortino.
Nas súas saídas xa se atoparon con algunha que outra sorpresa. "Nunha ocasión atopamos un lavalouza nunha zona onde retiraran area e quitámolo cunha carretilla", sinala. Tamén atoparon unha roda de tractor e un tubo de ferro "duns 40 ou 50 quilos". Non foron capaces de sacar do río este último obxecto debido ao seu elevado peso e optaron por polo en coñecemento do Concello, que se encargou da súa retirada.
Tras cada saída regresan cun mínimo de sete ou oito sacos cheos. Despois, separan os residuos: reciclan o que se pode e empaquetan e depositan en colectores o resto.
Manuel Díaz comparte imaxes das súas saídas nas redes sociais co obxectivo, di, de que cada vez se some máis xente a esta actividade. Considera que este movemento debe ir máis aló do traballo das institucións e móstrase convencido de que "ten que ser labor da cidadanía". "Espero que vaia calando e, sobre todo, que esta acción se note non río", sinala Díaz, que realizará novas saídas proximamente.
