Un grupo de veciños do barrio de Cobas, en Monforte, advirten dunha vertedura recorrente de lodos residuais do colector da Rúa Ourense. Segundo a denuncia interposta por un residente, José López López, ante o Seprona todo débese a un mal funcionamento da estación de bombeo, que fai que a auga salga por un aliviadoiro cara á canle do muíño en ruínas e termine no río Cabe.
O Concello afirmou este martes a este diario que non ten constancia da existencia destas verteduras, pero o veciño en cuestión insiste en que son moi habituais e agrávanse en épocas secas. Cando non chove, di José López, o mal cheiro expándese pola contorna.
En tempos nos que o Cabe vai desbordado a situación non é mellor. Segundo indica López a auga vertida realiza entón o percorrido á inversa e chegan a alagarse as hortas dos arredores cos lodos residuais. Él mesmo tivo dificultades nunha leira da súa propiedade situada a escasos metros da canle.
O problema afecta a un tramo da estrada que vai desde Cobas ata a parroquia de Piñeira, cuxos residentes son conscientes do que ocorre, segundo José López, quen espera que se mobilicen para "gañar forza e mellorar esta situación". Este veciño asegura que recolleu un total de doce firmas para protestar e pedir solucións ao Concello, ao que remitiron xa varios escritos.
O saneamento do río Cabe é unha materia pendente en Monforte de Lemos
José López destaca que o Seprona desprazouse ata o lugar varias veces. Unha delas o pasado xullo, cando, como explica, os axentes detectaron lodo de augas fecais de 80 centímetros de grosor. Este veciño de Cobas comenta que a unidade da Garda Civil encargada da protección da natureza volveu pola zona os últimos días e de novo subliñou a necesidade de acometer reformas para evitar a vertedura.
GRAVE PROBLEMA. O río Cabe ten graves problemas de verteduras, non só nesta zona senón noutros puntos do municipio, o que provoca que o caudal presente un pésimo estado en numerosas ocasións. O saneamento é unha materia pendente en Monforte de Lemos.
