Un veciño da chantadesa parroquia de Arcos, duns 30 anos de idade, é investigado como presunto culpable dun caso de malos tratos animais, xa que un total de 18 cans da súa propiedade, entre adultos e cachorros, estaban malnutridos e nun estado sanitario penoso.
Axentes ambientais da Xunta comisaron os cans na propiedade deste mozo situada no lugar de Outeiro, no municipio de Chantada, logo dunha denuncia do Seprona (Servizo de Portección da Natureza da Garda Civil).
Unha vez os veterinarios valoraron o estado da saúde dos animais, algúns foron trasladados a un refuxio e outros a un hospital veterinario para o seu posterior tratamento.
Algúns dos cans tiveron que ser trasladados a un hospital veterinario debido ao seu mal estado de saúde, presentando incluso cadros de sarna
A actuación dos axentes produciuse coa máxima celeridade unha vez recibida a denuncia do Seprona e tras a montaxe dun operativo para dispor de veterinarios, mobilizar aos axentes, preparar os vehículos de transporte, dispor de prazas no refuxio e solicitar a colaboración do Concello de Chantada.
MEDIO AMBIENTE. Tres veterinarios, un deles da Consellería de Medio Ambiente, ocupáronse de recoñecer aos animais, todos en mal estado de saúde e algúns con cadros de sarna. Os cans enfermos quedaron hospitalizados e actualmente están en tratamento, mentres que no refuxio permanecerán en corentena o resto dos animais comisados.
Segundo puido saber este diario, a Policía Local chantadesa tiña abertas varias dilixencias sobre a situación destes, denunciada de forma reiterada por veciños do lugar de Outeiro ao entender que non recibían os coidados precisos por parte do seu dono. Incluso, dixeron as fontes consultadas, o propietario dos cans deixábaos saír da propiedade para que paseasen libremente pola zona en busca de comida.
Non é a primeira vez que en Chantada se dá un caso con características similares a este.
