Os veciños da Rúa Duquesa de Alba de Monforte volveron mostrar o seu malestar polo ruído que teñen que soportar as fins de semana e que sae do interior dalgúns pubs que funcionan nesta rúa. Indicaron que por mor dos controis sobre o horario de peche levados a cabo polo Concello pasaron "unha pequena tempada máis ou menos tranquilos, un par de meses", pero que na actualidade volveron a padecer importantes molestias. Cren que as medidas adoptadas pola administración local, en forma de sancións, non están a obter os resultados desexados.
Pola súa banda, o alcalde monfortino, José Tomé, pediu un pouco de paciencia aos residentes en Duquesa de Alba para solucionar unha situación que cualificou de "complicada" e que, engadiu, "non se pode solucionar dun día para outro".
Indicou que o seu goberno foi o único que se interesou polo problema veciñal e que actuou en consecuencia, coa orde de peche de locais que non reunían os requisitos necesarios para funcionar e coa incoación de expedientes sancionadores a aqueles establecementos que incumpren o horario de peche.
A día de hoxe hai cinco sancións firmes por pechar a deshora, así como 24 pregos en fase de tramitación polo mesmo motivo. Algunhas delas son reiterativas, dirixidas aos propietarios do mesmo pub, quen se enfrontan a improtantes multas .
Pola súa banda, os donos de cinco pubs tramitaron permisos de obra para adaptar os seus negocios á regulamentación existente.
Se se axustan á lexislación non terán problema algún en recibir a licenza definitiva de actividade. Neste caso, o proceso está en trámite.
