Un veciño de Sober, Héctor Suárez, decidiu sumarse a todas esas persoas que nos últimos días están a solidarizarse cos profesionais que teñen que seguir traballando nos servizos públicos e padecen a escaseza de medios de protección persoal para evitar contaxiarse de coronavirus.
Por iso, puxo a traballar as dúas impresoras 3D que normalmente utiliza na fabricación de pezas para drons para facer máscaras de protección "autorizadas por Sanidade" que cedeu ao Concello de Sober.
Ata agora doou á administración local vinte máscaras de protección, que o Concello destinará á protección das traballadoras do servizo de axuda no fogar e do persoal de Protección Civil, que estes días se dedica á repartición de produtos básicos entre os veciños do municipio.
As dúas primeiras pezas fabricadas por Héctor Suárez foron para dous familiares que traballan na rama sanitaria, pero ante a situación de urxencia e a carencia de material de protección, tomou a decisión de usar as súas impresoras para a cesión desas máscaras de protección para o Concello de Sober.
Ademais, anunciou que, logo desa primeira entrega, pensa "seguir imprimindo máis máscaras para os hospitais ou sanitarios que as necesiten".
O alcalde de Sober, Luis Fernández Guitián, agradeceu o xesto, porque ademais de imprimir as máscaras en 3D, tamén se ocupa de preparalas cos elementos precisos para o seu uso, de modo que cobren todo o rostro do usuario, desde o mentón ata os ollos.