O turismo na Ribeira Sacra non deixa de crecer. Así o testemuñan os datos que manexa o consorcio encargado de promocionar a zona e que desde anos atrás fixouse como obxectivo a desestacionalización das visitas. Os números referentes a outubro son alentadores, pois o total da ocupación hostaleira alcanzou o 69 por cento, seis puntos porcentuais máis en relación ao mesmo mes do pasado ano.
Chama a atención o alto incremento de reservas nas vivendas turísticas, sobre un centenar no conxunto da comarca, un número que, di a xerente do consorcio, Alexandra Seara, crece día a día. Neste segmento, a ocupación foi do 69 %, pero chamando a atención que se subisen 19 puntos con respecto a hai xustamente un ano.
As casas de turismo rural tiveron tamén bos resultados. Os aloxamentos estiveron ao 62 %, dous puntos máis que en outubro de 2018. O único dato negativo, que non tanto para o conxunto do sector, foi que os hoteis de tres e catro estrelas retrocederon tres puntos porcentuais ata situarse nun 77 por cento de ocupación.
O sector hostaleiro prevé que o mes en curso sexa frouxo, pois falan dun 42 por cento de ocupación a nivel xeral
As cifras referidas ao pasado ponte de Todos os Santos si foron espectaculares, pois os hoteis de tres e catro estrelas foron ocupados ao 98 por cento, nove puntos máis que hai un ano; e as vivendas turísticas enchéronse nun 95 por cento, dous puntos máis que en 2018.
Non foi así no turismo rural, onde as súas casas perderon tres puntos, pero así e a todo alcanzaron o 90 por cento de ocupación.
MES DE NOVEMBRO. O sector hostaleiro prevé que o mes en curso sexa frouxo, pois falan dun 42 por cento de ocupación a nivel xeral, sendo os hoteis de tres e catro estrelas os máis beneficiados cun 62 das súas camas cheas.
De todos os xeitos, desde o consorcio indicouse que son números aceptables, tendo en conta que o pasado ano pechouse o mesmo mes cun 57 por cento de ocupación.
O consorcio deseñou para este mes numerosas actividades coa natureza como protagonista para atraer o maior número de visitantes.