As pescudas abertas para esclarecer se foi intencionado o accidente no que un vehículo chocou contra parte do Hospital Comarcal de Monforte inclúen a proba de alcoholemia ao condutor hospitalizado, identificado como J.L.L.S., de 37 anos.
Así o confirmou o alcalde de Monforte, Xosé Tomé, quen demandou á xente que teña "un pouco máis de sentido común", ante ese accidente que tachou de "rarísimo", tras encaixar un condutor o seu coche contra a área de rehabilitación, onde entrou o coche "ata o corredor".
O alcalde relatou que "sobre a unha da noite chamou a Policía Local e díxolle que un coche que estaba no estacionamento do propio hospital, dentro do centro hospitalario, sae recto e vaise encaixar contra unha porta de rehabilitación do hospital e métese dentro do corredor".
Nese momento "xa estaba o condutor en urxencias e pedirase a proba de alcoholemia agora que está no hospital para ver se tiña alcol ou non tiña porque non estaba en condicións de soprar naquel momento e pedirase aos médicos que fagan os estudos pertinentes", abundou o rexedor.
"Unha persoa que sae dese estacionamento, que de súpeto vai recto, non sei se lle deu un mareo, se se lle bloqueou a dirección. Non sei o que puido pasar. Haberá que esperar a ver o que din os informes policiais para facer algún tipo de valoración a maiores, se é un problema de saúde ou se é un problema tóxico, non o sei", comentou o rexedor.
Con todo, cualificou o accidente como "unha cousa rarísima", porque "o que coñece o Hospital de Monforte, que é unha zona de saída, con desprazamento lateral", ata a porta de rehabilitación "hai uns trinta metros e para meterse a velocidade tirar a porta e meterse no corredor francamente é un pouco raro", concluíu Xosé Tomei.
