José Tomé Roca non quixo pronunciarse acerca da polémica xerada polo plan para construír unha nova ponte sobre o río Cabe. O alcalde de Monforte e o resto de membros do xurado do concurso de ideas para levar a cabo o futuro viaduto do Malecón elixiron onte o proxecto gañador.
Mercedes é o nome da proposta vencedora. Finalizou con 643 puntos no primeiro posto dun certame ao que se presentaron outros seis licitadores. Este xoves darase a coñecer a identidade e a solvencia da persoa concorrente no salón de plenos da Deputación de Lugo.
CRITERIOS. Os encargados de seleccionar o proxecto debían valorar cun máximo de 40 puntos a calidade técnica da idea no seu conxunto, así como a adecuación ao programa de necesidades. Da mesma forma se avaliaban criterios de sustentabilidade e respecto ao medio ambiente. Os últimos 20 puntos outorgábanse pola viabilidade técnica e económica.
Todas as propostas presentadas debían ter como referencia de base a antiga ponte de ferro de Monforte, que veu abaixo nos anos 50 do pasado século. Situábase onde hoxe está o viaduto da Avenida de Galicia.
O investimento previsto supera o millón de euros
O obxectivo é quitar o tráfico de vehículos da ponte medieval e levalo á zona entre Ramberde e o Paseo do Dique, conectadas por unha pasarela peonil de madeira. O investimento previsto supera o millón de euros.
Ademais do alcalde formaron parte do xurado o secretario do Concello, José Antonio Mourelle; dous enxeñeiros designados pola Universidade da Coruña, outros tantos enviados polo Colexio de Camiños, Canles e Portos de Galicia e dous máis da Deputación de Lugo. Quen impulse a proposta gañadora non recibirá un premio en metálico, senón que se encargará de redactar o proxecto de construción da ponte e de dirixir a obra.