Testemuñas da historia de Monforte

Hai seis anos Ada Agrasar, a propietaria da librería Agrasar de Monforte, puña en marcha unha editorial propia para sacar ao mercado aquelas obras que gardasen algunha relación coa comarca de Lemos. A firma traballou sen descanso e esta mesma semana púxose á venda a óbra número 13 da editorial. Trátase da versión en galego dunha novela da monfortina Margarita Rodríguez Otero que leva por título Unha xoia para o káiser.

Segundo explica a editora, é unha novela de intriga pero garda un importante fondo histórico e fai referencia ao momento no que o cadro A Adoración dos Reyes, do pintor flamenco Hugo Van Der Goes, abandonou a pinacoteca do colexio do Cardeal de Monforte para ser entregado ao museo de Berlín. Foi un episodio cheo de luces e sombras e o recadado pola venda do cadro serviu para rematar o coñecido monumento.

Segundo Agrasar, a autora do libro é moi fiel aos feitos ocorridos, pero lles dá un carácter novelado que fai que a obra sexa atractiva para os lectores aos que lles interesa ese capítulo da historia monfortina e para os que, aínda que descoñezan ese episodio, gocen cunha boa novela de intriga. A publicación tamén sairá en castelán da man da editorial O Carreiro. É a terceira obra de Margarita Rodríguez que publica Agrasar. A primeira foi Confidencial. Eliminar ao Rei e a segunda, Terras de Lemos.

Agrasar Editores segue traballando e pronto publicará a súa primeira obra de poesía. Leva por título Vieiros da vida e é de Elvira Veloso. E aínda que a Ada non lle gusta desvelar máis plans porque asegura que o verán está completo, recoñece que ten pendente un libro sobre Catalina da Porca, a esposa do VII Conde de Lemos. "Aínda falta moito para iso", insiste a editora, pero recoñece que sería pertinente facelo despois de que en 2015 recuperásese Vida do VII Conde de Lemos.