A asociación cultural que organiza cada ano en Chantada o Castañazo Rock decidiu non celebrar a edición correspondente ao 2020 debido á pandemia. Desde o colectivo comunicaron que resulta "imposible" programar un evento "multitudinario coma o dos últimos anos" e garantir "a seguridade de asistentes, artistas e traballadores".
A organización do Castañazo engade que a decisión de suspender o festival estaba "pensada desde hai tempo". A tardanza en anunciala debíase á esperanza "de que coa chegada do verán a situación minguara".
A asociación afirma que a falta de tres meses para a data habitual do festival "impera unha total incerteza e inseguridade en canto ao desenvolvemento deste tipo de eventos" e subliñan os posibles rebrotes que obrigarían "á cancelación a poucos días da actividade", así como a "indefinición en canto a medidas sanitarias e de aforamento".
Desde o Castañazo mandan unha mensaxe de ánimo a todas as persoas que ano tras ano "fan posible o festival" e agradecen ás institucións públicas como o Concello de Chantada ou a Deputación de Lugo "a comprensión e a axuda amosada".
Tamén tiveron palabras para o municipio: "Queda sen un dos festexos máis importantes e que tanta repercusión económica e cultural ten".