A asociación Sosdesaparecidos, que axuda a familias que buscan a algún dos seus membros que desaparecen sen deixar rastro, sinalou na mañá de onte que o caso de Lucía Montero Gracía, unha lucense de 30 anos residente no centro de apoio aos discapacitados intelectuais Prodeme de Monforte, non pode considerarse como unha fuga voluntaria aínda que os primeiros indicios apunten a iso.
Un dos responsables deste colectivo en Galicia manifestou que a moza ten un 65 por cento de discapacidade e que puido haberse sentido coaccionada por alguén para abandonar o centro monfortino. Con todo, e no caso de que Lucía Montero fose consciente do que facía, para Sosdesaparecidos trátase dunha "fuga de moi alto risco".
A Policía Xudicial intenta localizar o paradoiro da moza a través do sinal do seu teléfono móbil, máxime cando enviou mensaxes de texto aos seus familiares dicindo que se atopa ben. Lucía Montero García é unha muller de 1,70 metros de estatura, complexión delgada, pelo louro e ollos azuis.
