A asociación O Sorriso de Daniel continúa coa súa campaña en redes sociais sobre a pandemia centrada en elementos do románico da Ribeira Sacra. Este mércores publicarase unha gráfica que ten como motivo principal un capitel da igrexa de San Paio de Abeleda no Concello de Castro Caldelas.
Nas vésperas da festividade de fin de ano, o colectivo recordará que "o bicho anda solto", en referencia ao covid-19, sobre unha imaxe dun capitel cheo de monstros.
Será a sexta destas imaxes que ata agora recordan a necesidade do uso de máscara, a conveniencia de ventilar, a recomendación de limitar o aforamento nas reunións familiares ou de amigos ou que é do todo necesario de gardar unha distancia social con outras persoas non convivientes.
A campaña lanzouse co apoio do consorcio de turismo da Ribeira Sacra, que tamén publica nas súas redes estas instantáneas grafiadas.
Os seus fins son promover, defender, estimular e apoiar a conservación do patrimonio medieval galego
Pola súa banda, O Sorriso de Daniel acaba de enmarcar todas elas, un total de oito, para envialas á Unesco, o organismo que no verán do próximo ano avaliará a candidatura da Ribeira Sacra a Patrimonio da Humanidade
DEZ ANOS. O Sorriso de Daniel é unha asociación creada en Santiago de Compostela o 6 de marzo de 2010 co ánimo de promover o románico galego.
Os seus fins son promover, defender, estimular e apoiar a conservación do patrimonio medieval galego, a difusión exterior e dentro do Galicia todas as manifestacións da arte románico, pero tamén o fomento do seu estudo e coñecemento.
Nunha década, O Sorriso destacou numerosas mostras do chamado románico rural que hai en Galicia a través de diferentes soportes gráficos.