O Concello de Sober habilita desde fai 15 días camións cisterna para trasladar auga a unha decena de núcleos de poboación deste municipio do sur da provincia de Lugo que tamén sofre os efectos da seca
O alcalde, Luís Fernández, constatou que esta situación lles afecta "como a outros concellos da contorna, porque na zona sur, segundo a Confederación Hidrográfica (Miño-Sil), estase en alerta máxima pola seca na conca do río Cabe".
No caso concreto de Sober, o rexedor subliñou que a auga da traída municipal "abastece a un 80 por cento da poboación que non ten problemas de subministración porque ademais dos mananciais, que é moi escasa, bombean directamente do río Cabe".
"O que sucede é que gastamos máis diñeiro do habitual porque hai que bombear e clorar e o bombeo é máis caro que a subministración que vén dos mananciais", aclarou Fernández.
No entanto, isto non é óbice para que haxa problemas en moitos lugares que teñen traídas locais". "Sober conta con 22 parroquias e preto de 300 núcleos onde moitos teñen traídas locais e neste caso están a fallar moitas", detallou.
O caso é que Luís Fernández acreditou que "desde hai quince días, e cada día máis, pode ser que haxa entre oito e dez lugares" que precisan auga "con cisternas propias".
"Nalgúns puntos son casas illadas e nalgún pobo que conta con dúas casas pois igual só vívese nunha delas, unha persoa ou unha familia, e hai que levarlles auga", certificou o alcalde.
Deste xeito, Sober súmase a outros moitos concellos da provincia onde xa se impuxeron restricións ao consumo de auga, como Ferreira de Pantón, Castro de Rei, Ribas do Sil ou Taboada.
