Unha empresa monfortina, Alcor, foi a encargada de velar pola seguridade durante a cabalgata de Reis Magos de Madrid, a máis mediática e posiblemente de maior importancia de todas cantas se celebran en España. Velou por que non pasase nada durante o percorrido de catro quilómetros dos seus Maxestades de Oriente entre Novos Ministerios e a Praza de Cibeles.
Para iso, a compañía dirixida por Carlos Somoza necesitou un equipo formado por 270 persoas. Había 180 auxiliares e 90 vixiantes con catro coordinadores. Sobre 30 deses operarios desprazáronse desde a propia Monforte.
Un dos máximos responsables do dispositivo foi David Ruiz. "Desde Emilio Castelar ata Colón había 32 bancadas con capacidade para 250 persoas, cada unha delas con dous vixiantes e un auxiliar. Debaixo contabamos con outro efectivo e tiñamos traballadores diante e detrás de todas as carrozas", explicaba este luns.
No seu empeño por conseguir que a multitude de persoas que asisten á cabalgata madrileña gozasen sen sobresaltos, Ruiz estivo axudado por Julio Ferrer, Adrián Piñeiro e Antonio Moreno. "Destaco tamén que Carlos Somoza, o director xeral de Alcor, estivo desde o primeiro momento dirixindo", engadiu.
O traballo comezou ás cinco e media da madrugada do día 4 ao 5 e non chegou ao seu fin ata as doce do mediodía deste luns, cando se terminou de desmontar todo o armazón de seguridade. "Un evento como este necesita dunha preparación previa moi profunda, establecendo zonas de evacuación nas que había un auxiliar máis", detallou o profesional, unha das cabezas visibles que Alcor ten na zona de Madrid.
SATISFACCIÓN. David Ruiz afirmou que Alcor estivo en permanente contacto cos corpos de seguridade das distintas administracións públicas, tanto estatais como autonómicas e municipais. "Se ocorría algo estabamos ben cubertos pola Policía Local de Madrid", asegurou.
A cabalgata finalizou e a tensión acumulada durante horas de traballo desembocou nun abrazo dos coordinadores de seguridade por ver que todo saíra segundo o previsto. "É moi gratificante que te feliciten o alcalde e os distintos concelleiros polo traballo que fixeches", comentaba este luns un David Ruiz que logo de atender a El Progreso dispúñase a gozar do día festivo coa súa familia e os seus fillos. "Agora tócalles a eles", concluíu.
SEGUNDO AÑO, CON DISTINTO GOBERNO. É o segundo ano que Alcor asume a responsabilidade de xestionar a seguridade durante a cabalgata de Reyes de Madrid. A empresa monfortina gañou a concesión con Manuela Carmena como alcaldesa e en 2019, hai xusto un ano, estreou os seus servizos na capital de España.
Para deseñar o complexo sistema de seguridade, David Ruiz especifica que se celebraron varias reunións. Algunhas tiveron lugar en Madrid e outras, en Monforte.
Os cacheos tamén son parte indispensable do protocolo. A idea era dar con obxectos contundentes, material de vidro, bebidas alcohólicas ou armas brancas co ánimo de requisalos. "Aínda hai a quen lle estraña que non se poidan levar coitelos ou navallas a unha actividade como esta ,"destacou Ruiz.
Con todo, un dos maiores temores de todo o armazón de seguridade afectaba á mítica Praza de Cibeles. David Ruiz aseverou que o pasado día 5 en Madrid estableceuse o nivel catro de alerta antiterrorista. O máximo é cinco, polo que risco de que houbese un atentado era alto.
EN CIBELES. Todo valado e con entre 1.200 e 1.400 cadeiras. Así estaba, en boca de David Ruiz, unha das zonas máis emblemáticas de Madrid. Así mesmo foi necesaria a intervención de cen escoltas para velar pola seguridade persoal de non poucos asistentes. Cibeles era un dos catro tramos nos que Alcor dividiu o seu particular mapa de seguridade de Madrid. Estas zonas eran, ademais da citada, Novos Ministerios, bancada e dispersión.
