As rutas fixas para contemplar o patrimonio románico non quixeron ser menos no crecemento da Ribeira Sacra desde un punto de vista turístico. O xa extinto 2019 foi para a comarca o da marca de ocupación hostaleira no verán e o de maior congregación de peregrinos polo Camiño de Inverno. Tamén foi un ano de auxe no referente ás visitas aos templos deste estilo arquitectónico.
Segundo os datos facilitados pola empresa de turismo cultural Máis que Románico, os percorridos deseñados para coñecer as igrexas deste tipo foron feitos o ano pasado por unhas 900 persoas. Esta cifra supón un aumento de 200 respecto de 2018. As responsables do servizo destacan que o patrimonio que máis visitas recibiu foi o de Pantón e O Saviñao.
Outro dos aspectos a ter en conta afecta ás vivendas de uso turístico. Este tipo de establecementos hostaleiros puxéronse moi de moda na Ribeira Sacra. Consisten en construcións como casas grandes ou adegas situadas en poboacións rurais que caeron en desuso e que os seus propietarios rehabilitan para pór ao servizo de quen chegan a pasar uns días de desconexión.
Máis que Románico asegura que o repunte das vivendas de uso turístico -polas que adoitan apostar grupos de persoas que viaxan xuntas pola flexibilidade de horarios e a intimidade- notouse. Un gran número de usuarios hospedáronse neste tipo de apartamentos.
PROCEDENCIA. Desde Máis que Románico apuntan que os turistas que veñen á Ribeira Sacra a contemplar o patrimonio románico desde outros lugares de Galicia están á alza. Tamén hai un incremento do interese polos templos na propia comarca.
Respecto ao resto de España, os visitantes máis frecuentes proveñen de Castela e León, Andalucía, Castela A Mancha, Madrid, Euskadi, Estremadura, Valencia, Murcia e A Rioxa. Como novidade en 2019 percibiuse un auxe en Aragón. Na contorna das igrexas houbo, ademais, acentos de países como Portugal, Australia, Estados Unidos, Inglaterra ou República Checa.
A información sobre estas rutas transmítese sobre todo pola chamado boca a boca, é dicir, coñecidos que as fixeron antes. Outras fontes importantes o ano pasado foron a propia web de Máis que Románico e as oficinas de turismo de Pantón, Monforte, Sober e Chantada.
