O novo empresario monfortino Roberto Eireos Sáez comunicou á primeira hora da noite deste mércores que rexeita encabezar a candidatura do Partido Popular por Monforte ás eleccións municipais do 26 de maio do próximo ano. Faino, segundo indicou a través dun comunicado, porque non quere formar parte dun "circo do que son totalmente alleo e do que non vou participar".
Así foi de taxativo. Incluso, declarou que a súa intención é desmarcarse totalmente de calquera proposta, dando a entender que non desexa saber nada do PP, nin tan sequera volver formar parte da corporación de Pantón, da que é concelleira desde o 2015.
Roberto Eireos, nun comunicado que a última hora deste mércores xa circulaba profusamente polas redes sociais ante o estupor de todos, indicou que dera o si "a participar nun proxecto incluínte, de unión de diversas sensibilidades (do PP) a favor de intentar sacar a Monforte da parálise na que está instalada desde hai anos".
Con todo, engadiu, que está moi lonxe dos seus desexos ser o protagonista dun espectáculo de circense do que, destaca, é totalmente alleo.
AGRADECEMENTO. Tamén declarou que agradece as mostras de apoio recibidas e que lle desexa o mellor ao PP, "ao meu partido", e á súa presidenta local, Julia Rodríguez Barreira, que espera teña "éxitos tanto no profesional como no persoal".
Eireos finaliza o seu comunicado : "Como bo monfortino que son, desexo o ben para este municipio. Aí seguirei estando para o que humildemente poida achegar".
Este diario intentou sen éxito contactar co secretario do PP lucense, o saviñao Juan Carlos Armesto Quiroga, para que se pronunciase sobre a renuncia de Eireos e para coñecer se o PP dispón dun plan B ou, pola contra, non quedará máis remedio que volver botar man da persoa que xa descartara, Julia Rodríguez Barreira, candidata nos comicios de 2011 e 2015 con resultados desiguais nestas convocatorias.
O PROCESO. A crise no seo do PP monfortino xurdiu o pasado 31 de outubro, cando este xornal desvelou que Roberto Eireos sería o candidato á alcaldía polo PP monfortino e de forma inmediata saíu á palestra Julia Rodríguez, responsable local, dicindo que non sabía nada do asunto, do mesmo xeito que os concelleiros do seu grupo municipal, que pediron acalaraciones á dirección provincial.
Foi cando a crise estalou. Julia Rodríguez chegou a desprazarse a Santiago para falar co presidente do PP galego, Alberto Núñez, quen non a recibiu, sendo escoitadas as súas queixas polo seu número dous, Miguel Tellado.
Poucos días despois, o secretario do PP en Lugo, Juan Carlos Armesto, declarou que non había tal crise en Monforte, que todo estaba solucionado e que Roberto Eireos encabezaría unha lista se non gañadora polo menos ilusionante.
De feito, Armestó falou dunha candidatura "forte", que sería pactada e na que estarían "os mellores".
O responsable de organización dos populares lucenses tamén destacara o feito da necesidade de pensar "máis aló do personalismo" e que o inmovilismo non era bo, en clara referencia á necesidade de relevar a Julia Rodríguez Barreira,
Sexa como fose, na dirección do Partido Popular de Lugo teñen unha importante crise en Monforte a tan sos seis meses das eleccións locais.
