O Consello Regulador Ribeira Sacra informou de que os días 26 e 27 de maio recuperará a Precata e Cata dos Viños da denominación de orixe, despois de que os técnicos do órgano reitor recollesen 84 mostras nun total de 32 adegas da comarca.
Das mostras que serán sometidas á consideración do panel de cata, 27 son de viños tintos, 16 de viños brancos e 41 doutras anadas.
Con respecto á última cata, celebrada en 2019, preséntanse 20 viños máis, e destaca o incremento de mostras na categoría doutras anadas, que pasa de 16 a 41 inscritas.
Estas son, precisamente, as tres categorías do certame: Viños Brancos, Viños Tintos e Viños doutras Anadas. Nas categorías de strong<> Brancos e Tintos establécense 3 premios: Medalla de Ouro, Medalla de Prata e Medalla de Bronce.
En categoría de Outras Anadas concederanse 2 Medallas de Ouro, ao superar as 14 mostras participantes.
Técnicos do Consello Regulador recolleron 3 mostras ao azar de entre o stock das adegas.
Este mércores, día 25 de maio, o notario procederá ao embolsado, precinto e numeración das botellas, que permanecerán convenientemente custodiadas ata a celebración da Cata.
Os viños serán catados por series, de modo que o xurado comezará polos Viños Brancos e terminará cos viños de Outras Anadas.
O número máximo de viños seleccionados que pasarán á Cata final será de 10 para a categoría de Viños Tintos e 6 para as categorías de Viños Brancos e Viños doutras Anadas.