A Ribeira Sacra vendeuse este venres na feira internacional de turismo Fitur que se celebra en Madrid como un "paraíso de interior" que gaña ano tras ano visitantes atraídos polas paisaxes e a oferta cultural e gastronómica.
A promoción desta zona reuniu en Ifema durante a mañá do venres a representantes de administracións e entidades que conforman o Consorcio da Ribeira Sacra.
No acto de presentación participaron o presidente da Deputación de Lugo, José Tomé; a directora de Turismo de Galicia, Nava Castro, e a directora xeral de Patrimonio Natural, Belén do Campo; ademais de alcaldes da comarca.
"Sempre digo que a Ribeira Sacra é un anaco de paraíso no interior de Galicia, e a súa declaración como Reserva da Biosfera é un dos feitos que o confirma", resaltou José Tomé.
A declaración por parte da Unesco da Ribeira Sacra e Serra do Oribio como Reserva da Biosfera chegou o pasado ano 2021 e fai que, como recordou o presidente lugués, a provincia de Lugo teña "máis do 80% do seu territorio" baixo este instrumento de protección.
Pola súa banda, Belén Do Campo manifestou que a declaración supón "un fito máis" na posta en valor do territorio que "abre unha nova oportunidade para demostrar que se pode combinar perfectamente a conservación da biodiversidade e do patrimonio natural co desenvolvemento sostible".