O 2019 será para sempre o ano no que a denominación de orixe Ribeira Sacra superou por primeira vez os sete millóns de quilos de uva colleitados. É a mellor colleita desde que comezaron os rexistros en 1996. Un exercicio infestado de boas noticias, premios e cada vez máis relevancia internacional para os viños da comarca despediuse coa comida anual organizada polo consello regulador.
O evento tivo lugar en Chantada, máis concretamente no restaurante Finca Quinteliña. Alí reuníronse representantes políticos de distintas administracións, membros do consorcio de turismo e da propia denominación de orixe e, por suposto, adegueiros de todas as subzonas da Ribeira Sacra. Eles foron os grandes protagonistas e quen máis aplausos acapararon.
Antes de que se servisen os pratos, o presidente do consello regulador, José Manuel Rodríguez, presentou a cada un dos 19 premiados no Mondial des Vins Extremes. Trátase do concurso de enoloxía máis importante do mundo, reservado aos viños producidos en rexións de montaña ou en zonas de cultivo consideradas heroicas, é dicir, realizadas a máis de 500 metros de altitude, con pendentes de terreo superiores ao 30% ou en terrazas. Ribeira Sacra conseguiu doce medallas para viños tintos, catro para brancos e tres para caldos doutras anadas.
PREMIOS. Na categoría de viños brancos da colleita de 2018, Ribeira Sacra fíxose con tres ouros grazas a Viña Garoña, Godello Vía Romana e Blanco Joven Abadía da Cova, de Adegas Moure. A medalla de prata conquistouna Almalarga, de Alma das Donas.
Na división de viños tintos, as medallas para Ribeira Sacra estiveron repartidas, seis de ouro e outras tantas de prata. O primeiro premio gañárono Viña Mesquita, de José Manuel Vidas López; Viña Peón, de Ernesto Rodríguez Pérez; Castrofiz Barrica, de José Luís Pedreira; Don Cosme, de EDV; Finca Cuarta, de Rubén Moure Fernández; e Regina Viarum.
Capador, de Adega Tear; Val da Lenda, de Víctor Manuel Rodríguez; Don Bernardino, Tradición, de Jorge Feijóo González; Malcavada, de Araceli Vázquez Rodríguez; e Prómine, de Adegas Petrón, foron condecorados coa prata. Os viños doutras anadas lograron o ouro e foron Regina Viarum Ecolóxico 2016, Don Bernardino Leira Mesquita 2014 e Condado de Sequeiras Barrica 2016.
