Condé Nast Traveler destaca algúns dos proxectos levados a cabo ao longo da comarca para aproveitar a súa esencia e dinamizar a zona. Incluso recomenda varios establecementos e actividades. Na súa lista aparecen Apartamentos Cabo do Mundo e Casa Vistaboa, os restaurantes A Faragulla e Miguel González, empresas como Leira Míllara, Adegas Moure, Vía Romana ou Airas Moniz e rutas turísticas como as de Quinta Sacra ou Máis que románico.
"Quedeime absolutamente anonadada da riqueza do lugar, isto debería ser un orgullo a nivel patrimonial", destaca Clara Díez, a autora da reportaxe, que non dubida en definir Ribeira Sacra como "o Santo Graal da conexión coa terra".
A revista enxalza os percorridos en embarcacións polos canóns dos ríos Sil e Miño e a beleza de elementos como a fervenza de Augacaída ou os viñedos en socalcos. "En Ribeira Sacra atópanse proxectos que tratan de revalorizar os seus territorios tirando de fórmulas culturalmente vinculadas a Galicia e a procesos tradicionais", explica Díez, quen engade que a zona rural "é moi vasta, o que a fai se cabe máis interesante, porque hai prácticas aquí que non se dan no resto do mundo".
Na reportaxe publicada por Condé Nast Traveler, a mestra quesera recolle igualmente testemuños de persoas como Luisa Rubines, de Quinta Sacra, ou a familia que rexenta Adegas Moure. Todos estes recursos son para Clara Díez un claro exemplo de creación dun turismo sostible.
Como mestra quesera, unha das súas paradas imprescindibles foi na fábrica chantadesa de queixos Airas Moniz. "Apóstase por ter menos animais para aproveitar as características do terreo e eses verdes permanentes", conta Clara.
Para Condé Nast Traveler, o modelo de produción de Ribeira Sacra é sostible e un valor de futuro. "Algúns dos que se marcharon volveron. Déronse conta de que o futuro estaba aquí, na terra e no río", asegura Clara, cuxo reportaxe pode lerse na revista ata febreiro.
Unha influente nacida en 1987
Relevancia
Condé Nast Traveler converteuse na actualidade na publicación sobre viaxes e estilos de vida máis influente do mundo. Nela descóbrense os destinos máis exclusivos.