O Obispado de Lugo ultima os preparativos para que unha empresa contratada polo Ministerio de Cultura inicie dentro dun mes unha ampla e profunda restauración do interior da igrexa de San Vicente do Piñeiro de Monforte, que linda co Parador de Turismo.
O responsable de patrimonio da diocese lucense, o monfortino Cérsar Carneiro, sinalou que a empresa contratada para levar adiante os traballos xa contactou co párroco do templo para fixar datas. Estímase que nun principio a igrexa poderá permanecer aberta ao culto, pero en canto avancen as obras será preciso clausurala.
E é que a intervención é de importante envergadura, como o demostra o investimento previsto, que excede os 800.000 euros, e o prazo marcados que son de case un ano.
AS ACTUACIÓNS. O proxecto do Ministerio de Cultura propón unha intervención integral no interior da igrexa, restaurando as pinturas murais do presbiterio, nave central e muro norte do cruceiro, o retablo maior e o retablo en pedra que hai tamén no cruceiro.
O retablo maior, de estilo barroco, está realizado entre 1770 e 1780 e é atribuído a un monxe do mosteiro. Dedícase á figura de San Vicente e alberga unha gran pintura que representa o Martirio de San Vicente, obra de Bernardo da Pena en 1671.
Esta conxunto mostra numerosos danos vinculados ao paso do tempo, as filtracións de auga e ao uso relixioso que se foi facendo do mesmo nos últimos séculos.
Pola súa banda, o retablo en pedra está localizado no brazo norte do cruceiro e alberga varias capelas no seu corpo inferior.
En canto ás pinturas murais, recuperaranse as que decoran o presbiterio e que foron realizadas na década de 1920 polo monxe pintor burgalés Lesmes López Pérez. Tamén se restaurarán as renacentistas do século XVII, que foron descubertas baixo varias capas de cal na á norte do cruceiro durante unhas primeiras obras de restauración da igrexa levadas a cabo entre 2010 e 2011.
Esta é unha acción longamente reclamada polos veciños, que se remonta a finais da década dos 90, cando se comezou a alertar da necesidade de intervir se se quería que o interior do templo non sufrise un colapso.
