O pleno da Deputación de Lugo aprobou por unanimidade na sesión celebrada este martes un convenio específico para o centro de atención a maiores de Ribas de Sil. Este é o último trámite interadministrativo entre o Concello e o organismo provincial antes de proceder á apertura da residencia, que se prevé que sexa este ano.
O presidente da Deputación sinalou que o acordo dá mostra de que a institución provincial avanza e cumpre co compromiso que adquiriu cos concellos en materia de residencias, e coas partidas destinadas á apertura de novos centros cando aprobou os orzamentos deste exercicio económico.
Con este convenio establécese a prioridade de acceso ás prazas no centro para os veciños de Ribas de Sil e en segundo termo para os dos municipios limítrofes ou da comarca; e despois, para os veciños da provincia en xeral.
O convenio recolle que a Deputación se compromete a efectuar o financiamento previsto, a actuar como órgano de contratación e a impulsar un equipo técnico especializado no ámbito dos servizos sociais.
Pola súa banda, o Concello comprométese a colaborar coa institución provincial e a facer as achegas económicas previstas.
Así mesmo, o documento inclúe o orzamento de máis de 2,8 millóns de euros para as próximas catro anualidades para o funcionamento da residencia.
Desde a Deputación de Lugo sinalaron que para cumprir cos compromisos cos concellos en materia de residencias, só no que vai de mandato, abriu catro novos centros de maiores, en concreto na Fonsagrada, Castroverde, Pedrafita do Cebreiro e Meira, que se suman aos tres que xa estaban en marcha nos municipios de Trabada, Ribadeo e Pol.
