Axentes ambientais da Xunta de Galicia rescataron a 18 cans, adultos e cachorros, que se atopaban en mal estado no lugar de Outeiro, no municipio lucense de Chantada, logo dunha denuncia cursada polo Servizo de Protección da Natureza (Seprona) da Garda Civil.
Segundo informou a Xunta de Galicia, a actuación por parte dos axentes produciuse "coa máxima celeridade", unha "vez recibida a denuncia do Seprona".
Para a retirada dos animais, foi preciso montar un dispositivo formado por axentes Medioambientais da Xunta de Galicia, veterinarios e vehículos de transporte adaptados, ademais de dispor de prazas suficientes no refuxio e de solicitar a colaboración do Concello de Chantada.
Ao final, tres veterinarios, un deles da Consellería de Medio Ambiente, Territorio e Vivenda fixéronse cargo do recoñecemento facultativo dos cans e, tras valorar o seu estado de saúde, uns foron trasladados a un refuxio e os demais a un hospital veterinario para recibir tratamento.
A Delegación Territorial da Xunta informou de que todos "estaban en mal estado de saúde e algúns con cadros de sarna".
Os animais que foron trasladados ao refuxio permanecerán en corentena.
