As persoas que acudían todos os domingos ao parque dos Condes de Monforte a vender produtos da horta, mobles vellos, roupa nova e usada e moitos máis artigos organizáronse para rexeitar a orde da alcaldía de suspender de forma indefinida este mercadillo. Os afectados polo peche montan a diario desde hai dous días unha mesa na Rúa Cardeal de Monforte para a recollida de firmas que apoien a súa demanda, que non é outra que o mercadillo poida volverse a celebrar.
A última hora da mañá de onte dispuñan de case 400 rúbricas. A muller que ofrecía aos viandantes que apoiasen a súa proposta sinalou que a Policía Local tomáralle a súa filiación ao non dispor de permiso municipal para ocupar a vía pública e levar a cabo esa recollida de formas.
Tamén sinalou que o grupo do que forma parte leva días intentando reunirse co alcalde, José Tomé, para reconducir a situación, pero que ata o momento non obtiveron resposta algunha.
DECISIÓN. O alcalde socialista José Tomé Roca emitiu días atrás un decreto no que prohibe de forma indefinida o mercadillo dominical que se celebraba no parque dos Condes desde facía unha década. Indicou que a decisión a tomou atendendo a un informe dos servizos xurídicos municipais, que detectaron varias irregularidades, como a inexistencia dunha regulación municipal tanto para a ocupación do dominio público como para o exercicio da venda ambulante.
Tomé engadiu que existe un espazo específico para a venda ambulante, o mercado gandeiro das Lamas, onde todos os 6 e 24 de cada mes celébranse feiras.
