Cando a pandemia do covid-19 pase, Quiroga poderá presumir de dispor dunha esquina para darse bicos e abrazos. Así o di o novo mural que hai na vila e que contribúe a eliminar aqueles espazos que a deslocen. Para loitar contra o feísmo, o Concello e a asociación Quiroga en Marcha realizaron varios murais de grandes dimensións naqueles espazos que presentaban un aspecto menos agradable. O novo mural, confeccionado polo quirogués José Luís Lemos, forma parte do proxecto Museo de Arte Urbana ao Aire Libre.
A obra é unha máis dunha iniciativa da que tamén forma parte un traballo do artista coruñés Joseba Muruzábal, que pintou a unha veciña do municipio no lateral dunha vivenda da Praza Maior e outra alegórica á vendima na Rúa San Martiño.
Así mesmo, o vigués Germán González, que escolleu unha alvariza na que non falta un oso rondeándola para buscar mel, pódese visitar na medianeira dunha casa da Praza Maior.
OS INICIOS. O primeiro mural de Quiroga realizouse nun lateral do albergue municipal e representa a imaxe da mitológica Lavandeira do Sil, obra do artista Miguel Peralta. Seguiulle outra no pavillón municipal da artista viguesa Abi Castelo, que representa a dúas mulleres.
A iniciativa forma parte dun proxecto compartido co Concello para facer un museo de arte urbano ao aire libre na vila
Os traballadores do taller de emprego SilLor VI pintaron o muro da praza do albergue municipal na parte que dá colexio de educación Infantil e Primaria. Aínda que non é un debuxo artístico, a súa composición xeométrica de vistosas cores fai que o seu impacto visual non deixe a ninguén indiferente.
Seis puntos da vila quiroguesa que non eran nada atractivos esteticamente pasaron a agradar a vista dos transeúntes, tanto dos veciños como de todos aqueles que se acheguen ata a vila como punto de partida para coñecer o geoparque Montañas do Courel.
O proxecto de arte urbano de Quiroga é unha acción máis incluída no amplo programa deseñado xunto aos concellos de Ribas de Sil e O Courel para que os técnicos da Unesco vexan, cando realicen a avaliación do estado do geoparque, que existe un claro compromiso das administracións e dos veciños cara á conservación e mellora do territorio.
