O xuízo contra o veciño de Monforte acusado de violar á filla da súa parella, menor de idade, retomouse este mércores na Audiencia Provincial de Lugo coa declaración dos peritos, entre os que se atopaban as dúas psicólogas do Imelga que atenderon á nena tras a denuncia. Segundo explicaron ante a sala, analizaron o estado da menor para comprobar se era viable avaliala –xa que ten recoñecida unha discapacidade do 67%– e comprobaron que era posible. "Con todo, cando despois falamos con ela, a nena ofreceu un relato deslavazado e descontextulizado, sen a calidade suficiente, polo que non puidemos determinar o grao de credibilidade do que contaba", sinalaron.
Aínda así, as psicólogas recolleron nas conclusións do seu informe que os resultados da avaliación da menor "podían ser compatibles coa situación de abusos denunciada".
No transcurso do interrogatorio tamén prestaron declaración os forenses e a xinecóloga que explorou á menor. Tal e como sinalaron, no corpo da vítima "non había rachos, nin laceraciones, nin nada que indicase violencia". Os forenses explicaron que a menor lles contou que o acusado a obrigou a manter relacións sexuais e que ela non se defendeu, senón que se deixou levar".
En canto ás probas de ADN, os policías que recolleron as probas explicaron que a avoa da nena acudiu coa menor á comisaría e entregoulles as probas que ela mesma recollera no seu domicilio. Segundo explicaron, a muller recolleu un preservativo do lixo do baño e entregouno en comisaría "na mesma bolsa" que a roupa interior e o pixama da menor.
Os axentes da Policía Científica de Monforte analizaron estas probas, así como a roupa interior do acusado e a colcha da cama onde presuntamente se produciu a agresión. Os especialistas atoparon en todos estes obxectos "unha mestura de perfís xenéticos compatibles cos perfís da vítima e do procesado"
Sobre este aspecto, o avogado da defensa alegou que os resultados de as probas de ADN non avalan a versión da menor, tanto pola forma na que foron recollidos, como porque "nun piso no que conviven catro persoas, que comparten varias zonas da vivenda e colocan a roupa xunta, é normal que haxa ADN de todos, ou dalgún deles, en diferentes obxectos".
O letrado do acusado engadiu que o preservativo presentado como proba inculpatoria, lonxe de acharse ADN da presunta vítima, atopáronse restos dunha terceira persoa que non tería nada que ver co núcleo familiar composto por avoa, nai e filla.
Sexa como fose, a menor mantivo a súa versión nos dous días de xuízo e reiterou que o acusado a violou na madrugada do 28 de agosto de 2018, cando tiña 15 anos de idade. Negou con todo algúns aspectos recollidos no escrito de acusación da Fiscalía, como que o home lle ensinase vídeos de contido pornográfico "para inmiscila nun contexto sexual".
O home, pola súa banda, negou rotundamente os feitos e asegurou que "xamais" mantivo relacións sexuais coa nenaO ministerio público acúsao dun delito continuado de agresión sexual a menor de 16 anos e solicita para el 18 anos e nove meses de prisión, así como 10 anos de liberdade vixiada e 25 de afastamento.
VISTO PARA SENTENZA. O caso tería que continuar hoxe, pero a tenor das probas periciais realizadas e das declaracións duns e outros o xuízo quedou visto para sentenza, anulándose vístaa prevista para hoxe.
O acusado enfróntase a unha pena de 18 anos e nove meses de prisión.
Esta é a petición do fiscal, que o avogado defensor, sempre que non logre a libre absolución do seu defendido, reclamou que se rebaixe a 15 anos.
