Mellorar a accesibilidade na cidade de Monforte mediante a eliminación de barreiras arquitectónicas e a instalación de elementos que favorezan a mobilidade de todos aqueles que usan cadeiras de rodas ou que padecen algunha discapacidade nas súas facultades motoras ten un prezo. Un proxecto encargado polo Concello cifra en 295.000 euros o custo das accións a desenvolver en once edificios e instalacións de uso público e en catro parques.
O alcalde monfortino, o socialista José Tomé Roca, presentou na tarde do mércores o plan, que espera estea totalmente executado antes de finais deste ano. Está convencido diso, xa que hoxe sae a concurso público a súa adxudicación, tendo de prazo as empresas interesadas para presentar as súas propostas ata o día 26 deste mes. A mesa de contratación reunirase o 7 de abril.
Tomei indicou que se intervirá na casa consistorial, no Centro do Viño, na praza de abastos, na casa da cultura, no edificio multiusos, no estadio e no pavillón polideportivo de A Pinguela, na piscina climatizada, nas Casitas da Compañía, na gardería municipal e no centro cívico situado no Paseo do Dique.
Tamén se incluíron no proxecto os parques da Pinguela, A Compañía Doutor López Suarez e A Florida.
O alcalde sinalou que todas as intervencións recollidas na acción son froito dos apuntamentos dados pola consultora en accesibilidade Combina Socia, ademais de atender suxestións da Confederación Galega de Persoas con Discapacidade (Cogami).
José Tomé mostrou o seu convencemento de que este proxecto, que quedará executado antes de que finalice este ano, converterá a Monforte "nun referente en materia de accesibilidade", á vez que, engadiu, "podemos falar da aposta por unha mellor calidade de vida para os nosos veciños e de todos aqueles que se acheguen ata esta capitalidade da Ribeira Sacra, un territorio que é o segundo máis buscado en Galicia despois de Santiago", destacou.
