O Partido Popular de Monforte quere que Roberto Eireos, un empresario que hai cinco meses ía ser o candidato ás eleccións municipais do 26 de maio, ocupe agora o número dous da lista que liderará outra moza, unha avogada chamada Katherinie Varela.
Na dirección do PP dáse por feita a incorporación de Eireos, aínda que este, na tarde do luns, indicou que ten unha serie de condicións. No caso de que sexan atendidas, engadiu, dirá si a ser o segundo da candidatura. Entre as súas esixencias estaría, segundo as fontes consultadas, ser designado deputado provincial,
ESTUPEFACCIÓN. No seo da familia popular monfortina existe estupefacción ante os movementos que hai na agrupación a pouco máis dun mes para as eleccions locais, pero sobre todo polo "desconcerto reinante", en palabras de varios militantes cos que contactou este diario e que preferiron manterse no anonimato. Engaden que se antes era difícil obter uns resultados "dignos con todas estas manobras, propias do Circo do Sol, se o 26 de maio obtemos tres concelleiros poderiamos darnos por satisfeitos".
En seis meses, o Partido Popular contemplou como candidatos a Eireos, Lemos e Katherinie Varela tras descartar a Julia Rodríguez
INCERTEZA. E é que todo se remonta a outubro do pasado ano, cando a dirección provincial do PP decidiu apartar a Julia Rodríguez, a súa candidata á alcaldía nas dúas últimas citas electorais, por falta de confianza no seu proxecto, para colocar no seu lugar a Roberto Eireos.
Con todo, Julia Rodríguez deu a batalla e logrou que o novo empresario renunciase tras a presión padecida.
A cousa non quedou aí e, de urxencia, puxéronse os ollos noutro mozo, un médico chamado Miguel Lemos, quen aceptou liderar o PP pero que hai catro días deu a espantada de forma sorpresiva.
O PP tiña grandes esperanzas na súa persoa. Foi elixido para o proxecto popular monfortino tras a renuncia de Eireos e descartar totalmente a Julia Rodríguez.
Nada se sabe dos motivos de Lemos para abdicar, pero fálase de que se atopou coas distintas familias existentes en Monforte e que se deu conta de que non dispoñía do apoio necesario para levar adiante unha iniciativa que consistía, insistira en varias ocasións, en unilas todas nun obxectivo común. Ao PP non lle quedou outra que tirar de lista e colocar a Katherinie Varela dun.
Responsabilidades
Hai quen cre que pasadas as locais será necesario pedirlles a ambos responsabilidades polo ocorrido en Monforte.