A presidenta provincial do Partido Popular e deputada autonómica, Elena Candia, pediulle este martes ao presidente da Confederación Hidrográfica Miño-Sil (CHMS), José Antonio Quiroga, explicacións sobre o alarmante baixo nivel de auga no encoro de Belesar.
Candia cualificou a Quiroga, presidente da CHMS e número dous de Gonzalo Caballero no PSDEG, como irresponsable, por permitir que nesta época do ano o nivel da presa sexa inferior ao 30% da súa capacidade.
A presidenta do PP de Lugo fixo estas declaracións logo de comprobar en Chantada o baixo nivel da auga na presa de Belesar, acompañada por alcaldes e portavoces dos municipios afectados.
En Chantada, Candia recordou que os encoros xestionados pola Xunta de Galicia están nestes momentos ao redor dun 65% da súa capacidade, polo que espera que o número dous de Gonzalo Caballero aclare e xustifique as circunstancias nas que se produciu o baleirado deste encoro.
Así mesmo, recordou que a preocupación pola situación dos encoros da CHMS levou aos populares a pedir explicacións ao propio Goberno e á CHMS a través de diversas iniciativas no Parlamento de Galicia, o Congreso e o Senado
