Dous axentes da Policía Nacional resultaron feridos en Monforte mentres trataban de reducir a un mozo na Rúa Doutor Casares. Os feitos ocorreron na madrugada do sábado ao domingo, despois de que o implicado negásese a ser identificado e saíse fuxindo.
O suceso comezou na Rúa Zapardiel. Os axentes achegáronse a un vehículo detido no medio da calzada cunha persoa de entre 25 e 30 anos de idade no seu interior. Fontes consultadas indicaron que o condutor fixera manobras esquivas co coche uns minutos antes, razón pola cal os policías se achegaron a preguntarlle se era seu.
Ante esta cuestión, o mozo arrincou e tratou de escapar. Os axentes saíron detrás del e pediron axuda á Policía Local. Na Rúa Doutor Casares interceptárono e procederon a reducilo, pero o implicado resistiuse.
Os policías viran ao home facer manobras esquivas co coche e, ao preguntarlle pola propiedade do mesmo, fuxiu
No medio da liorta, os dous policías foron agredidos e terminaron a xornada con varios danos físicos. O home, que finalmente foi detido, defendeuse duramente e non puido ser reducido ata que varios policías locais interviñeron.
Descoñécese que levou ao detido, de nacionalidade romanesa, a saír fuxindo no medio da noite tras ser cuestionado pola Policía Nacional acerca da propiedade do coche.
OUTROS CASOS. Non foi o único feito violento ocorrido durante a fin de semana en Monforte. Na noite do venres ao sábado, sobre as seis da madrugada, dous homes asaltaron a un mozo na chaira da Compañía. A pesar de recibir un golpe na cabeza, ao peche desta edición a vítima aínda non puxera denuncia.
Nos últimos tempos sucedéronse outras situacións violentas no medio da noite en Monforte. Un dos casos máis soados foi o sucedido no bar Aturuxo, no barrio da Estación, a madrugada do 11 ao 12 de xaneiro. Entón, o propietario do local foi presuntamente agredido por unha muller duns 30 anos de idade. A vítima recibiu 70 puntos de sutura na cabeza tras ser golpeado con dúas botellas de viño.