O Consello da Xunta de Galicia acaba de darlle o visto e prace a un dos dez proxectos da Consellería de Medio Ambiente e Territorio recollidos no plan de acción estratéxica para a Ribeira Sacra co fin de impulsar a súa declaración como reserva da biosfera. Trátase de levar a cabo unha ordenación do medio físico da parroquia de San Fiz do Asma, no concello de Chantada.
A iniciativa ten por obxecto establecer a ordenación integrada deste ámbito en razón das súas especiais características naturais, ecolóxicas e paisaxísticas que compatibilicen a súa protección coa máis racional explotación dos recursos.
Desde a Xunta fálase dunha identidade diferenciada do territorio, dun gran contraste marcado pola profunda hendidura que supoñen os cursos fluviais, así como o forte pendente dos seus vales, que presentan grandes inclinacións e ladeiras con pronunciadas pendentes que permiten unhas vantaxosas condicións de exposición ao sol para levar a cabo unha viticultura de calidade.
No plan deseñado por Medio Ambiente para optar a que a zona sexa declarada reserva da biosfera tamén se fai mención á modificación da súa superficie natural, distribuída en socalcos que empregan a mesma pedra en pequenas terrazas horizontais para os asentamentos e vivendas, xa que elixen nun terreo accidentado aqueles lugares máis propicios.
Así, o plan de ordenación do medio físico conterá as determinacións relativas ás características diferenciais do ámbito e destacará os seus valores naturais e potencialidades, como soporte de actividades de carácter agropecuario, forestal, ecolóxico, recreativo, cultural ou científico.
Tamén se realizará unha diagnosis dos problemas suscitados polos usos existentes, medidas e normas de protección e de actuacións públicas ou privadas necesarias para a preservación, restauración ou mellora das diferentes zonas.
Incluso, o plan contempla a elaboración dunha normativa reguladora das actividades produtivas ou recreativas e información sobre a parcelación e as construcións vinculadas á explotación, goce e estudo dos recursos naturais.
Para rematar, tamén se elaborará un estudo económico para analizar a coherencia entre as normas e actuacións propostas e a dispoñibilidade dos recursos hidráulicos e enerxéticos, así como os seus efectos sobre o sistema produtivo, agrícola, gandeiro, forestal e extractivo.
A Xunta destacou que o plan especial da Ribeira Sacra suporá un investimento de 3,5 millóns cun paquete de dez actuacións nas que se implicarán todos os seus departamentos e nos que se contará co apoio de deputacións e concellos.
