A Deputación de Lugo decidiu redefinir un proxecto que presentou fai algo máis dun ano, consistente na construción en Monforte dunha canceira para animais abandonados para cubrir as necesidades dos doce municipios da Ribeira Sacra e doutros sete da zona centro da provincia.
A idea posta sobre a mesa polo anterior presidente do organismo provincial, Darío Campos, era que ese refuxio dese servizo ás comarcas de Sarria, Terra de Lemos, Quiroga e Chantada, unha ampla zona na que son moi poucos os concellos que dispoñen de asistencia para recoller cans abandonados.
Monforte ten asinado un contrato cunha empresa de Xinzo de Limia, criticado polos animalistas pola "súa precaria" efectividade en canto a tempos de atención. Pola súa banda, Quiroga dispón dunha canceira propia de xestión municipal que funciona correctamente. O resto dos concellos ou teñen convenios coa Protectora de Animais de Lugo ou non contan con axuda algunha para atender as súas necesidades neste sentido.
Fontes da Deputación de Lugo sinalaron na mañá deste xoves que se se optou por redefinir o proxecto iso tivo que ver coa necesidade de que sexa máis útil e á vez operativo, "que responda perfectamente ás necesidades da zona que abarque".
E é que o plan anunciado pola Deputación de Lugo fai máis dun ano propiciou críticas desde os grupos animalistas ao entender estes que era improbable que as instalacións estivesen preparadas para dar un servizo de calidade a un total de 19 municipios. Temían que se convertese nun sitio para deixar os animais á súa sorte, con escasa atención, o que sempre negou a Deputación.
Pontevedra e Lugo
En Galicia, as cidades con maior densidade de cans por habitante son Pontevedra (149,04 canes por cada mil habitantes) e Lugo (148,99).