Boa parte do persoal que traballa no centro de saúde de Monforte concentrouse este xoves para solicitar unha maior seguridade á hora de levar a cabo a atención primaria e en protesta polas agresións sufridas o pasado mércores por dúas traballadoras, unha administrativa e unha enfermeira. A primeira recibiu insultos e ameazas dunha usuaria que logo se atopou cunha segunda no corredor e golpeouna.
As persoas que convocaron a protesta, que levou a cabo diante do propio ambulatorio plantando cara á choiva, afirman que este tipo de situacións son frecuentes na sanidade, aínda que recoñecen que moitas delas non saen á luz. Tamén piden máis celeridade á hora de actuar contra calquera tipo de agresión, xa sexa física ou verbal, e un nivel de prevención maior.
Algunhas das traballadoras sinalaron que ao acumular experiencia adquírense hábitos para actuar correctamente ante usuarios agresivos, pero os mozos están máis expostos. Por iso, reclaman un aumento das medidas de seguridade.
Na protesta participaron, ademais de persoal sanitario, integrantes doutros departamentos que exercen cada día a súa profesión no centro de saúde monfortino. Unha das dúas persoas agredidas traballa como administrativa. O xoves participou na concentración, pero non quixo facer ningún comentario achega do suceso.
Os feitos. Segundo manifestaron varias testemuñas, o ocorrido creou tal balbordo que provocou que moitas persoas saísen das súas consultas para ver que pasaba. Houbo quen creu que alguén se caeu ou sufrido algún contratempo e necesitaba axuda.
Todo comezou cando a usuaria implicada no suceso comezou a ameazar e a insultar á administradora en cuestión. As fontes consultadas relataron que os berros levantaron unha enorme expectación e escoitáronse en todo o centro de saúde.
Logo daquilo, a presunta agresora atopouse no corredor de camiño ás consultas cunha muller que fora a súa enfermeira con anterioridade, encarouse con ela e empezou a golpeala. Foi o momento de maior tensión, que obrigou a chamar a Policía Nacional e Local para que se desprazase ata o ambulatorio e puxese fin ao altercado.
Os axentes identificaron á suposta autora dos insultos e os golpes. Os motivos da súa reacción contra ambas as traballadoras descoñécense. Aínda así, desde o persoal destacaron que a muller sexa coñecida no centro de saúde por protagonizar xa varios incidentes similares ao do pasado mércores no interior do complexo sanitario.
