O pavillón municipal de Quiroga ten outro aspecto desde esta semana. Un mural ocupa parte da súa fachada principal. Ten como tema principal a igualdade e foi pintado por Abi Castillo, unha polifacética artista viguesa.
Castillo explica que o debuxo representa a dúas mulleres unidas polo pelo que simboliza a forza e apoio entre elas. Entre unha e outra hai vexetación e unha flor de cores verdes e rosas que brota, o que simboliza o rexurdir, segundo a simboloxía da artista viguesa.
E é que este mural non só ten por obxectivo adornar unha parede, senón que, baixo o título Sororidade, visibiliza o feminismo e a igualdade, así como o papel da muller muralista. “Hai moitos mozos que pintan na rúa, pero moi poucas mozas, así que é bo que nos dean visibilidade”, sinala Abi.
DESIGUALDADE. Aínda que no pasado si había máis homes que mulleres no mundo da ilustración, explica que agora están a reivindicar o seu espazo e non cre que ser muller ou home inflúa nun mundo que xa de por “se é complicado para os dous”, lamenta.
“Traballo como ilustradora e pintora na miña cidade e en Galicia”
Aínda así, recoñece haberse atopado con situacións desagradables mentres pintaba na rúa, así como comentarios que sabe “que non llos farían a un home”. Nunha ocasión, mentres axudaba a unha amiga cun mural, relata que tiveron que sufrir “gabanza soeces” ou preguntas do tipo “¿e isto fixéchelo ti soa?”.
Non é o caso de Quiroga, lugar no que Castillo asegura estar moi cómoda durante as máis de tres xornadas que investiu en completar o traballo, recibindo ademais numerosos comentarios positivos por parte da veciñanza.
A elaboración do mural enmarcábase nos actos organizados polo Concello para conmemorar o Día Internacional da Muller, unha acción financiada con cargo aos fondos do Pacto de Estado contra a Violencia de Xénero.
“Traballo como ilustradora e pintora na miña cidade e en Galicia”, di con orgullo Abi Castillo a propósito de que moitos dos seus compañeiros de profesión tivéronse que buscar a vida fose porque “non é fácil traballar no mundo de arte”. ela sábeo ben.
Tamén realizou debuxos para camisetas da firma Zara, pezas que viaxaron por medio mundo
Para ter un fixo ao mes tivo que recorrer no pasado a dar clases de pintura.
A MULLER COMO TEMA. A situación cambiou e agora Abi celebra poder dedicarse exclusivamente ao seu oficio. A isto contribuíron traballos como as ilustracións para o libro Pioneiras 2, que trata sobre mulleres galegas que fixeron grandes contribucións sociais ou conquistas de dereitos que legan ás novas xeracións.
Recoñece que é un dos encargos dos que está máis orgullosa. Tamén realizou debuxos para camisetas da firma Zara, pezas que viaxaron por medio mundo. “Dáme entre vergoña e orgullo cando as vexo pola rúa”, chancea mentres recorda cando se atopou a unha moza que vestía unha destas camisetas e estivo a piques de botar man do móbil para sacarlle unha foto.
Abi Castillo non deixa de traballar. Ten por diante o obxectivo de pintar novos murais, algúns tamén en colexios e coa igualdade como tema, porque esta ilustradora concibe a arte como unha ferramenta para concienciar e facer pensar aos máis novos. Non casualmente, o mural de Quiroga está situado xusto á beira do colexio de educación infantil e primaria.
