A operación Treilán, que o xoves propiciou a detención de dez persoas en Monforte, Sarria e Ourense relacionadas cunha banda criminal organizada que ofrecía coches de alta gama inexistentes e roubaba aos compradores interesados, segue en marcha.
Na tarde deste venres, axentes da Policía Nacional identificaron un mozo de etnia xitana, pertencente á familia do clan Romero Romero de Monforte, que tiña aparcado o seu coche preto da casa consistorial. Tras un exhaustivo rexistro, o mozo foi esposado e levado aos calabozos da comisaría da Policía Nacional.
Non foi a única operación levada a cabo polos axentes da orde pública este venres, pois houbo rexistros noutras vivendas que están a nome da familia Romero Romero. Se o xoves se entrou en casas situadas nas rúas Otero Pedrayo, Ourense e Paseo de Lugo, este venres a Policía Nacional accedeu a outras situadas nas vías Eduardo Pondal, Calvo Sotelo e Coruña.
► Le máis: Agresións, vehículos queimados e tiroteos: así actuaban os ladróns
Ao longo da mañá deste sábado pasan polos xulgados da cidade do Cabe os tres detidos na localidade que están acusados de enganar e agredir a persoas que enganaban con falsos anuncios de venda de coches de alta gama, que ofrecían a prezos moi baixos. Cando chegaban os compradores, os integrantes da organización criminal ameazábanos a punta de pistola e agredíanos antes de quedar co diñeiro que en metálico lles esixían traer para realizar a compravenda.
No xulgado de Sarria prestará declaración o único detido na localidade e en Ourense, o resto dos procesados.