Veintiseis anos despois de que a Rúa Cardeal de Monforte, a vía máis emblemática da cidade, fose convertida en peonil tras cambiar totalmente a súa fisionomía cun solado a base de laxas de granito, a rúa será practicamente levantada de novo. A actuación, que comezou onte e durará dous meses, ten como obxectivo acabar cos problemas detectados no solado que se arrastran desde a súa construción. Para iso será precisou levantar 5.000 pezas de pedra dentro dunha actuación que conta cun orzamento de execución que se eleva a case 300.000 euros.
A intención do equipo de goberno que preside o socialista José Tomé Roca é que a Rúa Cardenal luza a súa nova imaxe de face ao verán deste ano. Para iso haberá que levantar todo o pavimento para refacelo. A metade das laxas existentes, segundo os técnicos que elaboraron o proxecto, poderán ser reutilizadas ao atoparse en bo estado de conservación.
O plan inclúe, ademais, o levantamento dos lastros que rodean as árbores e a terra que hai debaixo súa para corrixir os desniveis producidos polas súas raíces secundarias, ademais do desmonte do mobiliario urbano, a canalización de augas pluviais e as luminarias, que se instalarán de novo ao terminar as obras. Tamén se deixarán gabias pensando en futuras instalacións de cableado.
DESDE O INICIO. Os problemas nesta rúa detectáronse ao pouco tempo do seu remate, tanto que en 1999, apenas cinco anos logo da conclusión da obra, o goberno local, en mans do popular Nazario Pin, encargara un informe a unha empresa especializada, a firma Norcontrol, para determinar as causas dos problemas de solidez que padecía o pavimento.
Esta determinou que se deron graves anomalías na execución do proxecto que tiñan que ver co morteiro utilizado para fixar as laxas de granito e na calidade da pedra.
O estudo que recollía todas estas circunstancias pasou polo pleno da corporación en 1999 e logo no 2000, cando se ratificou esixirlle á empresa que levou a cabo as obras, Indeza, responsabilidades. Con todo, nunca se chegaron a cursar por vía xudicial.
O caso da Rúa Cardeal non foi o único problema que o Concello tivo con esta empresa. Tamén os padeceu co acabado do edificio multiusos ao detectarse deficiencias na cuberta, así como na pavimentación da Rúa Doutor Casares, no tramo coñecido como A Pena, onde lastros e laxas de granito levántanse cada dous por tres.
