O grupo municipal do PSOE en Taboada demandou melloras para o colexio do municipio en vistas da situación excepcional ocasionada polo covid-19. Os socialistas presentaron unha moción aprobada no pleno da corporación para reclamar á Xunta a diminución do cociente de alumnos por aula. Tamén solicitan a inclusión dunha liña de subvencións de concorrencia competitiva para comprar material escolar dixital no proxecto orzamentario do Concello de cara a 2021.
A moción propón igualmente aumentar as partidas destinadas á limpeza de centros, convocar unha reunión urxente cos representantes do sector educativo do Concello e coas Anpas e a creación dun consello escolar municipal que se reúna periodicamente.
Os socialistas taboadeses chaman ademais a informatizar a oficina de correos. O portavoz local do PSOE, Roi Rigueira, considera fundamental ampliar o seu horario de atención ao público e que estea dispoñible a última hora da mañá. Nese sentido, instou o Concello a facer unha petición formal a Correos.
