viernes. 23.08.2019 |
El tiempo
viernes. 23.08.2019
El tiempo

O mellor arranque

Johanna Gustavsson, gañadora do Ladies Open de 2018. AEP
Johanna Gustavsson, gañadora do Ladies Open de 2018. AEP

O Ribeira Sacra Ladies Open 2019 contará este ano cunha festa de presentación que terá lugar o vindeiro martes en Pantón

A sétima edición do Ribeira Sacra Patrimonio da Humanidade Ladies Open de Golf, que se disputará do 10 ao 13 de xullo no Oca Augas Santas de Ferreira de Pantón, terá este ano un comezo ao grande coa celebración dunha festa.

A cita celebrarase o martes 9 na Praza do Concello de Ferreira de Pantón a partir das 18.30 horas, cando se leve a cabo a presentación do torneo. Ás 19.00 horas está programada a actuación da banda Dani Barreiro and Friends, que repasará a mellor música española dos 70, 80 e 90. Haberá inchables para os máis pequenos e a recadación do evento irá destinada á Asociación Ruliños Terra de Lemos, que axuda aos nenos con necesidades especiais.

O Ladies Open é a gran cita anual do golf na provincia de Lugo e unha das dúas únicas probas do circuíto que se celebran en España. A gran novidade este ano será a disputa da xornada final o sábado día 13. O xoves 11 e o venres 12 realizaranse as roldas previas para decidir que 40 xogadoras optarán ao título na xornada final. Haberá 35.000 euros en premios.

A xornada do sábado, na que estará en xogo o campionato, será de portas abertas a todo o público que se queira achegar ao Oca Augas Santas de Ferreira de Pantón, o que sen dúbida dará colorido a unha proba que serve para dar a coñecer ano a ano as excelencias turísticas da Ribeira Sacra.

O evento contará cunha proba ProAm o mércores día 10. Na mesma, tres golfistas afeccionados compartirán equipo cunha das golfistas participantes.

Na edición do 2018 do Ladies Open impúxose a xogadora sueca Johanna Gustavsson por diante da francesa Vayson de Pradenne e da española Eung Jung Ji Kim.

O mellor arranque
Comentarios