Di o refrán que uns por outros e a casa sen varrer. Algo parecido é o que pasa cos servizos de atención temperá en Monforte, onde as familias e profesionais como logopedas, fisioterapeutas, psicólogos e neuropediatras reclaman que se poña en marcha un servizo deste tipo de carácter municipal, con cargo ás liñas de axudas de Política Social e que funcione tamén "na práctica e non só no papel", a unidade que o Sergas (Servizo Galego de Saúde) anunciou para o hospital comarcal.
Como servizo sociosanitario, a atención temperá pública en Galicia depende de varias administracións (as consellerías de Política Social, Sanidade e Educación, os concellos, as deputacións e varias asociacións). Así, na actualidade, na comunidade galega hai tres tipos de unidades públicas: as de titularidade municipal, as dos hospitais e as xestionadas pola Asociación Galega de Atención Temperá (Agat) nas comarcas do Deza, Salnés e Bergantiños.
As tres liñas son complementarias e os pequenos poden recibir apoio en varias unidades de distintas liñas á vez. O reto é pór a disposición das familias os maiores e mellores recursos posibles nunha comunidade na que a atención temperá está en cueiros. Nestas aulas é posible recorrer a profesionais de distinto perfil: fisioterapeutas, psicólogos, orientadores, terapeutas, rehabilitadores...
Pero a realidade é que os nenos de Monforte non teñen acceso adecuado a ningún destes servizos e a reclamación actual das familias céntrase en que se poña en marcha unha unidade de carácter municipal, como xa funciona, por exemplo, na QuirogaDesde ela dáse cobertura a oito concellos da Ribeira Sacra (o propio Quiroga, Ribas de Sil, O Courel, Sober, Pantón, O Saviñao e A Pobra do Brollón) e está apoiada por Política Social.
Esta consellería leva varias anualidades convocando unha partida anual de fondos para que os municipios cren as unidades. O prazo de solicitude por parte dos concellos está a piques de abrirse para este 2022 e nesta ocasión a Xunta financia entre o 90% e o 100% do custo das horas do traballo efectivo dos profesionais e fai unha achega para os gastos correntes das unidades. Os concellos, pola súa banda, deben achegar os locais e organizar o funcionamento do servizo.
Os concellos de Carballedo, Taboada e Chantada xa manifestaron a través dos seus alcaldes a intención de solicitar unha unidade conxunta, pero desde o Concello de Monforte non se percibe esa sintonía. E os pais están preocupados porque non queren que se deixe escapar un recurso básico para cada vez máis familias.
A única condición para que un concello ou un conxunto deles opten ás axudas é que somen unha poboación superior a 10.000 habitantes. Ese é o caso de Monforte, con máis de 18.000.
O SERGAS. O alcalde monfortino, José Tomei, e o seu equipo de goberno fían a atención temperá só á unidade que o Sergas creou no hospital comarcal. De feito, en varias declaracións dos últimos días, Tomei pediulle ao Sergas que a faga operativa porque carece de profesionais e é totalmente ineficaz.
O Sergas contestou o rexedor que os profesionais do hospital universitario Lucus Augusti (Hula) pasan consulta cada semana en Monforte para evitar que os nenos se despracen a Lugo e que se traballa en reforzar o servizo.
As familias danlle a razón ao alcalde na disputa co Sergas. Levan anos reclamando a Sanidade que dote de máis persoal as unidades dos seus hospitais, pois hai listas de espera infinitas e os nenos non contan con terapias na frecuencia necesaria. Pedíronlle, ademais, que achegue á poboación un servizo que, aseguran, segue moi precarizado.
Pero as nais tamén lle recordan ao alcalde que a do Sergas non é a única vía e que ten na súa man crear xa unha unidade de atención temperá municipal.