Niño de Elche, Mercedes Peón, Oliver Laxe ou Davide Salvado son algúns dos artistas que forman parte do programa da quinta edición do Sacra Festival, presentada este venres, "un festival único en España" que se diferencia polo seu carácter polifacético e pola integración das súas actividades co medio ambiente en diferentes municipios da Ribeira Sacra.
Na presentación deste festival participou a súa directora artística, Carlota Pérez, así como o músico Davide Salvado, o enólogo Roberto Regal e representantes das institucións que colaboran coa organización do Sacra Festival, como son a Xunta, a Deputación de Lugo ou o Concello de Chantada.
"O Sacra Festival non é só unha programación cultural, é unha filosofía que vai máis aló da oferta de lecer e que comprende o respecto polo medio ambiente e a integración dos espazos da Ribeira Sacra" no seu cartel. "Sempre tivemos unha concepción de festival de pequeno tamaño, lonxe de eventos multitudinarios, con capacidades reducidas, para que o público poida gozar da contorna e dos espectáculos", explica Carlota Pérez.
O festival organízase ao redor de tres fins de semana —do 9 ao 11 de xullo, o 24 de xullo e do 5 ao 7 de agosto—, con máis de 15 actividades programadas, da man dunha decena de artistas. Esta quinta edición do Sacra Festival desenvolverase en espazos "singulares e paraísos da Ribeira Sacra do Miño", como "adegas, contornas naturais ou escenarios ao pé do río", todos eles cun "alto valor cultural e patrimonial, ao que terán que adaptarse os artistas e os seus espectáculos", porque se busca favorecer "a relación co público", pero tamén coa natureza da comarca.
A decena de artistas invitados cultivan disciplinas como "a música, a danza, o cine, a enoloxía ou a gastronomía". Forman parte do cartel o Niño de Elche, Mercedes Peón, Oliver Laxe, Chey Xurado, Davide Salvado ou Surma.
"Sacra Festival preséntase como
