A Garda Civil segue investigando o caso do falso delito de secuestro e extorsión do que se acusa a unha moza de Chantada, que simulou ser raptada para pedir aos seus pais un rescate de 7.000 euros. A moza, segundo puido saber este diario, fíxose responsable de todo o plan, pero os axentes sospeitan que o fixo presionada polas ameazas dun clan moi activo de narcotraficantes que opera na zona de Chantada, de orixe dominicano, aos que a moza debería unha importante cantidade de cartos.
A moza foi detida en Lugo xunto a un amigo de nacionalidade marroquí que lle gardaba a roupa na súa casa no momento de ser localizada, e que foi posto en liberdade tras prestar declaración, despois de que se desmontase o basto plan que tramou, no que chegou a enviar fotografías aos seus pais nas que aparecía coas mans atadas e gravacións de voces masculinas que aseguraban que a matarían se os proxenitores non lles entregaban 7.000 euros.
Os pais, ante a imposibilidade de conseguir o diñeiro, acudiron á Garda Civil, que desmontou a operación. Agora, tratan de identificar ás persoas que colaboraron con ela na montaxe do secuestro, en especial a quen fixeron as gravacións. Este diario puido confirmar que algunha desas persoas xa está identificada.
COMPRA ERRADA. Con todo, o principal perigo parece enfocarse cara a ese grupo de narcotraficantes que domina o mercado da cocaína na zona de Chantada. Segundo algunhas informacións, serían eles os que facilitarían unha importante cantidade de diñeiro á moza, de 22 anos e consumidora habitual, para que esta realizase unha compra fóra da provincia.
Pero esa compra saíu mal e a moza perdeu tanto o diñeiro como a mercancía, polo que podería estar a sufrir ameazas serias contra a súa vida que a impulsaron a idear a trama da extorsión aos seus pais para conseguir o diñeiro.
